چین میں طوفانی بارش اور سیلاب سے نظام زندگی درہم برہم ہوگیا۔
غیر ملکی میڈیا کے مطابق چین کے مشرقی علاقوں میں طاقتور طوفان باوی کی وجہ سے آندھی کے ساتھ تیز بارش سے سیلابی صورتحال پیدا ہوگئی۔
میڈیا رپورٹس میں بتایا گیا ہے کہ حکام کی جانب سے مزید بارشوں کی پیشگوئی کی گئی ہے جبکہ صوبے ژی جیانگ میں 20 لاکھ کے قریب لوگوں کو محفوظ مقام پر منتقل کردیا گیا ہے۔
اس کے علاوہ صوبے ہیبئی کے گاؤں کوانچینگ میں طوفان کے باعث تقریباً ایک ہزار 800 کے قریب افراد پھنس گئے اور سڑکوں پر پانی کی سطح 2 میٹر سے زائد بلند ہوگئی تھی۔
میڈیا رپورٹس کے مطابق سیلاب سے درجنوں گاڑیاں بھی بہہ گئیں جن کی ویڈیو سوشل میڈیا پر بھی وائرل ہورہی ہے۔
حکام نے بتایا کہ ملک بھر میں 46 دریاؤں میں پانی کی سطح خطرے کے نشان سے اوپر ریکارڈ کی گئی ہے ، موسم کی خراب صورتحال کے باعث سیکڑوں پروازیں اور ٹرین سروسز منسوخ کر دی گئی ہیں جبکہ کئی علاقوں میں اسکول بھی بند کر دیے گئے ہیں۔
