گزشتہ ماہ اداکار ٹائیگر شروف پر ہونے والے حملے نے بالی ووڈ میں سیکیورٹی کے معاملات کو دوبارہ توجہ کا مرکز بنا دیا تھا۔ اس واقعے کے بعد متعدد فلمی شخصیات نے اپنی حفاظت کے انتظامات مزید سخت کرلیے ہیں۔ اسی تناظر میں امیتابھ بچن کی جانب سے اپنے مداحوں کو ہفتہ وار اتوار کے روز بلٹ پروف شیشے کے پیچھے سے ہاتھ ہلانے کے منظر پر بھی گفتگو ہوئی، جسے منوج باجپائی نے تشویش ناک قرار دیا۔
ایک انٹرویو کے دوران جب ان سے پوچھا گیا کہ کیا بالی ووڈ میں ایک مرتبہ پھر انڈر ورلڈ کا خوف لوٹ رہا ہے تو منوج باجپائی نے کہا کہ وہ دور شاید کبھی واپس نہ آئے جب پوری فلم انڈسٹری کو نشانہ بنایا جاتا تھا۔ تاہم اب جرائم کی رفتار اور ان کے طریقے تبدیل ہوچکے ہیں۔ ان کے بقول، اب کوئی شخص کسی دوسرے مقام پر بیٹھ کر اپنے شوٹرز کو کسی ہدف پر حملے کے لیے بھیج سکتا ہے، لیکن ممکن ہے کہ حملے کا نشانہ بننے والا شخص اصل ہدف ہی نہ ہو۔
منوج باجپائی نے ٹائیگر شروف پر فائرنگ کے واقعے کا حوالہ دیتے ہوئے کہا کہ اس معاملے میں بھی اداکار مبینہ طور پر اصل ہدف نہیں تھے بلکہ حالات کے نتیجے میں نشانہ بن گئے۔ گرفتار ملزمان کے بیانات کے مطابق ان کا اصل ہدف سلمان خان تھے، جبکہ اکشے کمار، امیتابھ بچن اور عامر خان کے گھروں کی بھی مبینہ طور پر نگرانی کی گئی تھی۔
