اسلام آباد: وفاقی حکومت کی جانب سے آئندہ مالی سال کے بجٹ میں کراچی کے مختلف ترقیاتی منصوبوں کے لیے مختص فنڈز کی تفصیلات سامنے آگئیں۔
بجٹ دستاویزات کے مطابق کراچی اربن انفرا اسٹرکچر ڈیولپمنٹ پیکج کےلیے7 ارب 50 کروڑ روپےمختص کیے گئے ہیں۔
گریٹر کراچی واٹربلک سپلائی اسکیم کے لیے 10 ارب اور کراچی کوسٹل پاورپراجیکٹ یونٹ ون اور ٹوکے لیے ایک کروڑ روپےمختص کیے گئے ہیں۔
دستاویزات کے مطابق وفاقی بجٹ میں گرین لائن بس کے لیے ایک ارب98 کروڑ روپے مختص کیے گئے ہیں جب کہ کراچی میں سڑکوں،گلیوں، نکاسی آب اور پانی کے مختلف منصوبوں کے لیے فنڈز مختص کیے گئے ہیں۔
ضلع غربی میں انفرا اسٹرکچرکی بحالی کے لیے 24 کروڑ 54 لاکھ، ناظم آباد اور لیاقت آباد میں انفرا اسٹرکچرکی بحالی کے لیے 22 کروڑ روپے رکھے گئے ہیں۔
کراچی کے مختلف منصوبوں کے لیے وفاقی بجٹ میں لانڈھی،کورنگی میں سڑکوں، پانی، نکاسی آب اور پلےگراؤنڈز کے لیے 20کروڑ روپے مختص کیے گئے ہیں۔
دستاویزات کے مطابق ضلع وسطی میں سڑکوں،گلیوں، پانی اور نکاس آب کے لیے 4کروڑ 50 لاکھ روپےمختص کیے گئے ہیں جب کہ ضلع ملیر میں سڑکوں، گلیوں اور نکاس آب کے لیے 5 کروڑ روپے رکھے گئے ہیں۔
