نائیجیریا میں کان سے زہریلی گیس کے اخراج سے 37 افراد ہلاک

نائیجیریا میں کان سے زہریلی گیس کے اخراج سے 37 افراد ہلاک ہو گئے۔بین الاقوامی میڈیا رپورٹس کے مطابق شمالی وسطی نائیجیریا میں ایک کان میں زہریلی گیس کے اخراج کے نتیجے میں 37 افراد ہلاک اور 26 دیگر کو اسپتال میں داخل کرایا گیا۔پولیس ترجمان الفریڈ الابو نے ایک بیان میں کہا کہ یہ واقعہ منگل کی علی الصبح کمپانی زوراک کمیونٹی میں پیش آیا، جو پلیٹیو ریاست کے واس علاقے میں واقع ہےانہوں نے کہا، “ابتدائی تحقیقات سے یہ بات سامنے آئی ہے کہ کان کن لیڈ آکسائیڈ اور دیگر متعلقہ گیسوں جیسے سلفر اور کاربن مونو آکسائیڈ کے اچانک خارج ہونے کی وجہ سے متاثر ہوئے ہیں جو کہ انسانوں کے لیے زہریلے ہیں، خاص طور پر محدود یا ناقص ہوادار ماحول میں۔ان کا کہنا تھا کہ ہلاک ہونے والوں کی لاشیں ان کے اہل خانہ کو ان کے مذہبی طریقوں کے مطابق تدفین کے لیے سپرد کر دی گئی ہیں۔حکومت نے کان کنی کی جگہ کو بند کر دیا ہے اور گیس لیک ہونے کی تحقیقات جاری ہیں۔نائجیریا کے ٹھوس معدنیات کی ترقی کے وزیر ڈیل الیک نے ایک بیان میں کہا کہ کان کن اخراج کی زہریلی نوعیت سے لاعلم تھے اور انہوں نے اپنا کام جاری رکھا تھا۔