اوراب کھیلوں کی دنیا سے کچھ خبریں ۔۔
پرتگالی فٹ بال ٹیم کے کپتان کرسٹیانو رونالڈو نے ناقدین کو سخت جواب دیتے ہوئے کہا ہے کہ گزشتہ 23 سال سے مجھے تنقید کا نشانہ بنا کر میرا کیریئر ختم کرنے کی کوشش کی جا رہی ہے لیکن یہ کوشش کبھی کامیاب نہیں ہوئی۔41 سالہ رونالڈو نے اسپین کے خلاف ورلڈ کپ کے ناک آؤٹ میچ سے قبل پریس کانفرنس میں اعتراف کیا کہ میں پہلے جیسا کھلاڑی نہیں رہا، تاہم میں اب بھی ٹیم کے لیے مؤثر کردار ادا کر رہا ہوں۔انہوں نے کہا کہ موجودہ ٹورنامنٹ کے دوران میں 3 گول کر چکا ہوں اور اپنی ذمے داری پوری دیانت داری سے نبھا رہا ہوں۔فٹبالر نے واضح کیا کہ بین الاقوامی فٹبال سے ریٹائرمنٹ کا فیصلہ میں خود کروں گا، کسی اور کے کہنے پر یہ فیصلہ نہیں کیا جائے گا
دوسری جانب عالمی شہرت یافتہ برازیلین فٹبالر نیمار جونیئر نے برازیل کی ٹیم کے ورلڈ کپ سے باہر ہونے کے بعد ریٹائرمنٹ کا اعلان کر دیا۔نیمار جونیئر نے انٹرنیشنل فٹبال سے ریٹائرمنٹ کا اعلان ورلڈ کپ میں برازیل کی ناروے سے 2-1 سے شکست کے بعد کیا ہے۔انہوں نے ریٹائرمنٹ کا اعلان کرتے ہوئے کہا کہ میں نے نیویارک سے ہی اپنے کیریئر کا آغاز کیا تھا اور اب یہیں پر ختم بھی کر رہا ہوں، میں نے پوری کوشش کی لیکن اب سب ختم ہو گیا۔34 سالہ فارورڈ اپنے انٹرنیشنل فٹبال کیریئر میں 130 میچز کے دوران 80 گولز کر کے اپنی قومی ٹیم میں ٹاپ اسکورر رہے۔انہوں نے 2010ء میں ڈیبیو کیا اور 4 ورلڈ کپس میں برازیل کی نمائندگی کی۔فٹبالر نے 2 بار اولمپک گیمز میں بھی برازیل کی نمائندگی کی اور 2012ء میں سلور جب کہ 2016ء میں گولڈ میڈل جیتا۔
ناروے نے فیفا فٹبال ورلڈ کپ 2026ء کے پری کوارٹر فائنل میں 5 بار کی عالمی چیمپئن بننے والی برازیل کی ٹیم کو شکست دے کر ایونٹ سے باہر کر دیا اور کوارٹر فائنل میں جگہ بنالی اور 1990ء کے بعد ایسا پہلی بار ہوا ہے کہ برازیل کی ٹیم کوارٹر فائنل تک بھی نہیں پہنچ سکی۔
