“فیفا تنازع مزید گہرا، جبکہ ایمباپے کی قیادت میں فرانس سیمی فائنل میں پہنچ گیا!”

کھیلوں کی دنیا سے کچھ خبروں پر ایک نظر۔
یورپی ارکانِ پارلیمنٹ نے ریڈ کارڈ معطلی پر فیفا کے سربراہ انفانٹینو کے خلاف تحقیقات کا مطالبہ کردیا، قانون سازوں نے ٹرمپ کی مداخلت کے بعد بالوگن کی معطلی کو ختم کرنے کے فیفا کے فیصلے کو شرمناک قرار دیا ہے۔ان کا کہنا ہے کہ فیفا کے سربراہ انفانٹینو نے امریکی صدر ٹرمپ کی دوستی نبھانے کیلئے فٹ بال کی عالمی تاریخ کو مسخ کیا ہے۔ یورپین فٹ بال باڈی نے بھی اس فیصلے کو ناقابلِ فہم اور بلاجواز قرار دیا ہے۔غیرملکی میڈیا کے مطابق یورپی قانون سازوں کا مطالبہ امریکی اسٹرائیکر فولارین بالوگن کی ورلڈ کپ معطلی کو منسوخ کرنے کے تنظیم کے بے مثال فیصلے کے بعد سامنے آیا ہے۔ اس فیصلے نے یہ سوالات کھڑے کر دیے ہیں کہ آیا امریکی صدر ڈونلڈ ٹرمپ کے دباؤ نے اس اقدام پر اثر ڈالا۔رپورٹ کے مطابق، یورپی پارلیمنٹ کے ارکان کے ایک گروپ نے گزشتہ روز ایک مہم شروع کی جس میں اس فیصلے میں انفانٹینو کے کردار کی تحقیقات کا مطالبہ کیا گیا ہے۔
دوسری جانب ۔۔۔ کپتان ایمباپے اور ڈیمبیلے کی عمدہ کارکردگی کی بدولت فرانس نے مراکش کو شکست دیکر فیفا ورلڈ کپ فٹ بال کے سیمی فائنل میں پہنچنے والی پہلی ٹیم کا اعزاز حاصل کرلیا۔میچ کی ابتداء سے ہی فرانسیسی ٹیم چھائی رہی، میچ کا پہلا ہاف بغیر کسی گول کے برابر رہا لیکن اگلے ہاف میں چھ منٹ میں فرانسیسی ٹیم نے دو گول کرکے میچ اپنے نام کیا۔ بوسٹن اسٹیڈیم میں کھیلے گئے پہلے کوارٹر فائنل کا آغاز انتہائی شاندار تھا۔ فرانسیسی ٹیم نے مراکش کے گول پر کئی حملے کئے۔ایمباپے کو ڈی میں گرانے پر فرانس کو پینلٹی ملی لیکن ایمپاپے کی لگائی ہوئی ہٹ کو مراکشی گول کیپر نے باسانی روک لیا۔ پہلے ہاف میں مقابلہ بغیر کسی گول کے برابر رہا، دوسرے ہاف میں بھی فرانسیسی ٹیم نے مراکش کے گول پر کئی حملے کئے بلاخر 60 ویں منٹ میں ایمباپے نے گول کرکے ٹیم کو برتری دلوائی اور 66 ویں منٹ میں ڈیمبلے نے خوبصورت گول کرکے فرانس کی برتری ڈبل کردی۔